ÜMUMTƏHSİL MƏKTƏBLƏRİ, LİSEY VƏ GİMNAZİYALARIN
I SİNFİNƏ ELEKTRON SƏNƏD QƏBULU SİSTEMİ

2018-2019-cu dərs ili üçün Təhsil Nazirliyinin birbaşa tabeliyindəki lisey və gimnaziyalarda, Bakı, Gəncə, Sumqayıt şəhərləri və Abşeron rayonu üzrə ümumi təhsil məktəblərində I sinfə şagird qəbulunun elektron sistem vasitəsilə həyata keçirilməsinə dair

SUAL-CAVAB

Elektron sistem vasitəsilə I sinfə qəbul hansı rayon və şəhərləri əhatə edir?

Ərizələrin onlayn qeydiyyatı Bakı, Gəncə, Sumqayıt şəhərlərini və Abşeron rayonunu, eləcə də Təhsil Nazirliyinin birbaşa tabeliyindəki ümumi təhsil müəssisələrini əhatə edir.

Təhsil Nazirliyinin birbaşa tabeliyindəki lisey və gimnaziyalarda, Bakı, Gəncə, Sumqayıt şəhərləri və Abşeron rayonu üzrə ümumi təhsil məktəblərində I sinfə elektron sənəd qəbulu necə həyata keçirilir?

I sinfə şagird qəbulu www.mektebeqebul.edu.az elektron sistemi vasitəsilə həyata keçirilir.

Bakı şəhəri üzrə I sinfə şagird qəbulu hansı müddətlərdə həyata keçirilir?

Bakı şəhəri üzrə ərizələrin onlayn qeydiyyatı 22.02.2018-ci il tarixdən 15.09.2018-ci il tarixədək həyata keçirilir. 14.06.2018-ci il tarixədək elektron qeydiyyata alınan ərizələr üzrə sənədlər 20.06.2018-ci il tarixədək məktəbə təqdim olunmadığı halda, həmin ərizələr sistemdən silinir və təkrar qeydiyyat imkanı yaradılır. 15.06.2018-ci il tarixindən sonra elektron ərizəsi qeydiyyata alınan şəxslər üçün sənədlərin məktəbə təqdim olunma müddəti (iyul ayı istisna olmaqla) 18.09.2018-ci il tarixdə başa çatır.

Abşeron rayonu, Sumqayıt və Gəncə şəhərlərində I sinfə elektron sənəd qəbulu hansı müddətlərdə həyata keçirilir?

Abşeron rayonu, Sumqayıt və Gəncə şəhərləri üzrə ərizələrin onlayn qeydiyyatı 12.03.2018-ci il tarixdən 15.09.2018-ci il tarixədək həyata keçirilir. 14.06.2018-ci il tarixədək elektron qeydiyyata alınan ərizələr üzrə sənədlər 20.06.2018-ci il tarixədək məktəbə təqdim olunmadığı halda, həmin ərizələr sistemdən silinir və təkrar qeydiyyat imkanı yaradılır. 15.06.2018-ci ildən sonra elektron ərizəsi qeydiyyata alınan şəxslər üçün sənədlərin məktəbə təqdim olunma müddəti son olaraq (iyul ayı istisna olmaqla), 18.09.2018-ci il tarixdə başa çatır.

Təhsil Nazirliyinin birbaşa tabeliyindəki lisey və gimnaziyalara qeydiyyat nə vaxt aparılır?

Təhsil Nazirliyinin birbaşa tabeliyindəki lisey və gimnaziyalara ərizələrin qeydiyyatı fevralın 22-dən mayın 31-dək aparılır. Təhsil Nazirliyinin birbaşa tabeliyindəki lisey və gimnaziyalara, Bakı Şəhəri üzrə Təhsil İdarəsinin tabeliyində fəaliyyət göstərən 160 nömrəli Klassik Gimnaziya və 287 nömrəli “Zəkalar” liseyinə 2018-2019-cu dərs ili üçün I sinfə, ilk növbədə, həmin ümumi təhsil müəssisələrinin müəyyən edilmiş mikroərazisində yaşayan vətəndaşların ərizələrinin qeydiyyatı aparılır. Qeyd olunan ümumi təhsil müəssisələrinə müəyyən edilmiş mikroərazidə yaşayan vətəndaşların uşaqları müsabiqədənkənar qəbul edilir. Digər ərazilərdə yaşayan valideynlər (qanuni nümayəndələr) isə uşaqlarını qeyd olunmuş ümumi təhsil müəssisələrinə yalnız müsabiqə yolu ilə qəbul üçün qeydiyyatdan keçirə bilərlər. Həmin uşaqlar üçün müsabiqə iyun ayı ərzində keçiriləcək.

I sinfə şagird qəbulu həyata keçirilən rayon və şəhərlərdə ərazi prinsipinin tətbiqi gözlənilirmi?

Yalnız Bakı şəhərinin bir sıra məktəblərində I sinfə qəbul ərazi prinsipi əsasında aparılır. Abşeron rayonu, Sumqayıt və Gəncə şəhərlərində ərazi prinsipi tətbiq olunmur.

Məktəbəhazırlıq qruplarında komplektləşdirilmiş siniflərin I sinifdə də eyni müəllimə həvalə olunması nəzərdə tutulurmu?

Məktəbəhazırlıq qruplarında təhsil alan uşaqların valideynlərinin istəyini nəzərə alaraq, I sinifdə də onların eyni sinifdə komplektləşdirilməsi və eyni müəllimin tədris aparması nəzərdə tutulur. Bu qayda, 2017-2018-ci tədris ilində məktəbəhazırlıq qruplarında dərs deyən, 2018-2019-cu tədris ilində I sinifdə tədris aparması planlaşdırılan müəllimlərin dərs dediyi siniflərə şamil olunur.

Valideyn məktəbəhazırlıq qrupunda oxuyan övladı üçün yenidən həmin məktəbə I sinfə qəbul üzrə sorğu yerləşdirməlidirmi?

Xeyr, məktəbəhazırlıq qrupunda təhsil alan uşaq üçün sistem tərəfindən təhsil aldığı məktəb və müəllim avtomatik seçilir.

Sistem tərəfindən avtomatik sorğu yerləşdirildikdən sonra valideyn növbəti mərhələdə nə etməlidir?

Şəxsi kabinetdən ərizəni çap edib, digər müvafiq sənədlərlə birgə məktəbə təqdim etməlidir.

Valideyn məktəbəhazırlıq qrupunda təhsil alan övladı üçün I sinfə qəbul prosesində məktəbin digər müəllimlərindən birini seçə bilərmi?

Valideyn şəxsi kabinetə daxil olaraq yerləşdirilmiş sorğunu silib yenidən məktəb və müəllim seçə bilər.

I sinfə şagird qəbulu üçün hara və hansı sənədlərin təqdim edilməsi tələb olunur?

Valideyn (qanuni nümayəndə) I sinfə şagird qəbulu üçün aşağıdakı sənədləri məktəbə təqdim etməlidir:

  • Valideynin və uşağın şəxsiyyətini təsdiq edən sənədin əsli və surəti (uşağın şəxsiyyət vəsiqəsi olmadığı halda doğum haqqında şəhadətnaməsi; Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsi (olduğu təqdirdə); Birləşmiş Millətlər Təşkilatının Qaçqınların İşləri üzrə Ali Komissarlığının Himayə sənədi; xarici ölkələrdə verilmiş doğum haqqında şəhadətnamə (Azərbaycan dilinə tərcümə olunmuş və natorial qaydada təsdiq edilmiş));
  • uşağın sağlamlığı haqqında tibbi arayış (forma 26U);
  • 2 (iki) ədəd 3x4 ölçüdə rəngli fotoşəkil;
  • valideynin (qanuni nümayəndənin) “Şəxsi kabinet”indən çap olunmuş “Ərizə”.

Elektron sistem hansı zərurətdən tətbiq edilir?

I sinfə elektron sənəd qəbulunun tətbiqi “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Azərbaycan Respublikası Prezidentinin 23 may 2011-ci il tarixli Fərmanının tələblərinin həyata keçirilməsini təmin etmək üçün təhsil sahəsində əhaliyə göstərilən elektron xidmətlərin dairəsinin genişləndirilməsi, şagird kontingentinin uçot sisteminin təkmilləşdirilməsi məqsədilə tətbiq edilir. I sinfə şagird qəbulu üzrə müraciətlərin elektron qeydiyyat sistemi bu prosesin sadələşdirilməsinə xidmət edir.

I sinfə qəbulun elektron sistem vasitəsilə həyata keçirilməsi valideynlərə hansı imkanları verir?

I sinfə qəbulun elektron sistem vasitəsilə həyata keçirilməsi şəffaflığın təmin edilməsi, vaxt itkisinin aradan qaldırılması, cəmiyyətdə informasiya texnologiyalarından istifadə mədəniyyətinin formalaşması baxımından olduqca əhəmiyyətlidir.

Elektron ərizənin qeydiyyatı kim tərəfindən aparıla bilər?

Qeydiyyat valideyn (qanuni nümayəndə) tərəfindən onlayn (www.mektebeqebul.edu.az) və ya Abşeron rayonu, Bakı, Sumqayıt və Gəncə şəhərləri üzrə I sinfə elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə müəyyənləşdirilmiş 67 məktəbdə fəaliyyət göstərən Alternativ Qeydiyyat Mərkəzlərində aparıla bilər.

Alternativ Qeydiyyat Mərkəzləri harada fəaliyyət göstərir?

I sinfə elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə aşağıdakı məktəblərdə ərizə qəbulu üzrə Alternativ Qeydiyyat Mərkəzləri fəaliyyət göstərir.

  • Bakı şəhərinin inzibati rayonları – Səbail rayonu üzrə 7, 163, 236 nömrəli, Nizami rayonu üzrə 12, 129, 145, 214 nömrəli, Nəsimi rayonu üzrə 19, 44, 247 nömrəli, Yasamal rayonu üzrə 18, 21, 31 nömrəli, Nərimanov rayonu üzrə 57, 82, 177 nömrəli, Xətai rayonu üzrə 17, 24, 116, 165, 191 nömrəli, Sabunçu rayonu üzrə 69, 74, 75, 78, 128, 130, 170 nömrəli, Suraxanı rayonu üzrə 84, 270, 279, 285, 315 nömrəli, Qaradağ rayonu üzrə 110, 180, 195, 228, 274, 288 nömrəli, Xəzər rayonu üzrə 117, 120, 156, 181, 234 nömrəli, Pirallahı rayonu üzrə 235 nömrəli, Binəqədi rayonu üzrə 83, 102, 182, 297, 313 nömrəli tam orta məktəblərdə;
  • Gəncə şəhəri üzrə 10, 16, 25, 27, 32 nömrəli tam orta məktəblər;
  • Sumqayıt şəhəri üzrə 6, 16, 23, 28 nömrəli tam orta məktəblər;
  • Abşeron rayonu üzrə Xırdalan şəhəri 4 nömrəli və 6 nömrəli, Masazır kənd 3 nömrəli, Mehdiabad kənd 3 nömrəli, Qobu qəsəbəsi 1 nömrəli, Saray qəsəbə 3 nömrəli tam orta məktəblərdə.

Elektron sistemdən istifadə ödənişlidirmi?

Xeyr, elektron sənəd qəbulu sistemindən istifadə üçün heç bir ödəniş tələb olunmur.

Elektron sistemdə qeydiyyat zamanı istifadəçi hansı əlaqə vasitələrindən istifadə edə bilər?

Mobil telefon və ya elektron poçt ünvanı.

Məktəblərin seçimi hansı qaydada aparılır?

Valideyn (qanuni nümayəndə) elektron sistemdə seçdiyi məktəbə sorğu yerləşdirməlidir.

I sinfə qəbul üzrə müraciətlərin çox olduğu bəzi məktəblərdə şagird qəbulu, ilk növbədə, hansı prioritetlər nəzərə alınmaqla aparılır?

Bakı şəhərində yerləşən bir sıra məktəblərdə birinci sinfə onlayn qeydiyyat zamanı aşağıda qeyd olunan uşaqların məktəbə qəbul üzrə üstünlük hüquqları təmin olunur:

  • valideynləri və ya qanuni nümayəndələri məktəbin müəyyən edilmiş mikroərazisində yaşayanlar;
  • valideynləri və ya qanuni nümayəndələri həmin məktəbdə işləyənlər;
  • bacı və qardaşları həmin məktəbdə oxuyanlar

Bakı şəhəri üzrə I sinfə qəbul zamanı paytaxtda daimi qeydiyyatı olmayan, kirayədə yaşayan vətəndaşlar uşaqlarını elektron sistemdə qeydiyyatdan necə keçirə bilərlər?

Bakıda ərazi prinsipi tətbiq olunan məktəblərdə, ilk növbədə, həmin təhsil müəssisələrinin mikroərazisində daimi qeydiyyatda olan vətəndaşlar övladlarını elektron sistem vasitəsilə qeydiyyatdan keçirə bilərlər. Ərazi prinsipi tətbiq olunan məktəblərin mikroərazisində kirayədə yaşayanlar övladlarını yalnız həmin tədris ocaqlarında açılan I siniflərdə yer olduğu halda qeydiyyatdan keçirə bilərlər. Həmin valideynlərə kirayədə yaşadıqları ərazidə yerləşən məktəbdə sıxlıq olduğu halda, digər məktəbləri seçmələri tövsiyə olunur. Onu da qeyd edək ki, kirayədə yaşayan valideynlər ərazi prinsipi tətbiq olunmayan bütün məktəblərdə övladlarını I sinfə elektron sistem vasitəsilə qeydiyyatdan keçirə bilərlər.

Elektron qeydiyyat zamanı bir neçə məktəb seçmək mümkündürmü?

Xeyr. Valideynə yalnız bir məktəb seçərək sorğu yerləşdirmək imkanı yaradılır.

Valideyn məktəb seçdikdən sonra fikrini (seçimini) dəyişə bilərmi?

Bəli. Bunun üçün o, sistemə əvvəl yerləşdirdiyi sorğunu ləğv etməli, sonra yeni məktəb seçməlidir.

Xarici ölkə vətəndaşının elektron ərizəsinin qeydiyyatı necə aparılır?

Xarici ölkə vətəndaşının elektron ərizəsinin qeydiyyatı Azərbaycan Respublikasının ərazisində müvəqqəti və ya daimi yaşamaq üçün Dövlət Miqrasiya Xidmətindən aldığı icazə vəsiqəsi və xarici ölkənin doğum haqqında şəhadətnaməsi əsasında aparılır.

6 yaşı tamam olmayan uşaqların qeydiyyatı Təhsil Nazirliyinin birbaşa tabeliyindəki lisey və gimnaziyalara hansı müddətlərdə aparılır?

6 yaşı sentyabrın 16-dan dekabrın 31-dək tamam olan, xüsusi istedadı ilə fərqlənən uşaqların valideynlərinin (qanuni nümayəndələrinin) elektron ərizələrinin qeydiyyatı Təhsil Nazirliyinin birbaşa tabeliyindəki lisey və gimnaziyalara fevralın 22-dən mayın 31-dək aparılır.

6 yaşı tamam olmayan uşaqların qeydiyyatı Bakı Şəhəri üzrə Təhsil İdarəsi, Gəncə Şəhər Təhsil İdarəsi, Sumqayıt Şəhər Təhsil Şöbəsi və Abşeron Rayon Təhsil Şöbəsinin tabeliyindəki ümumi təhsil müəssisələrinə hansı müddətlərdə aparılır?

6 yaşı sentyabrın 16-dan dekabrın 31-dək tamam olan, xüsusi istedadı ilə fərqlənən uşaqların valideynlərinin (qanuni nümayəndələrinin) elektron ərizələrinin qeydiyyatı Bakı Şəhəri üzrə Təhsil İdarəsinin tabeliyindəki ümumi təhsil müəssisələrinə fevralın 22-dən iyunun 20-dək, Gəncə Şəhər Təhsil İdarəsi, Sumqayıt Şəhər Təhsil Şöbəsi və Abşeron Rayon Təhsil Şöbəsinin tabeliyindəki ümumi təhsil müəssisələrinə isə martın 12-dən iyunun 20-dək aparılır.

6 yaşı tamam olmayan uşaqlar elektron qeydiyyatdan keçirildikdən sonra onların məktəbə qəbulu hansı qaydada aparılır?

Bakı Şəhəri üzrə Təhsil İdarəsi, Gəncə Şəhər Təhsil İdarəsi, Sumqayıt Şəhər Təhsil Şöbəsi və Abşeron Rayon Təhsil Şöbəsi tərəfindən yaradılmış Müsabiqə Komissiyası tərəfindən “Xüsusi istedada malik uşaqların vaxtından əvvəl I sinfə qəbulu Qaydaları”na əsasən, iyun-iyul ayları ərzində müsahibə üsulu ilə aparılır.

6 yaşı tamam olmayan uşaqlar hansı hallarda I sinfə müsabiqədənkənar qəbul edilə bilər?

Təhsil Nazirliyinin birbaşa tabeliyindəki lisey və gimnaziyalara qəbul üzrə müsabiqədə iştirak edib uğur qazananlar və dövlət ümumi təhsil müəssisələrində dövlət hesabına məktəbəhazırlıq qrupunu bitirmiş uşaqlar I sinfə müsabiqədənkənar qəbul oluna bilər.

6 yaşı tamam olmayan uşaq Müsabiqə Komissiyasında müsahibədən keçməzsə, bununla razılaşmayan valideynlər hara və nə zaman müraciət edə bilərlər?

6 yaşı tamam olmayan uşaq Müsabiqə Komissiyasında müsahibədən keçməzsə, valideynlər Bakı Şəhəri üzrə Təhsil İdarəsi, Gəncə Şəhər Təhsil İdarəsi, Sumqayıt Şəhər Təhsil Şöbəsi və Abşeron Rayon Təhsil Şöbəsi tərəfindən təşkil edilən Apelyasiya komissiyalarına iyul-avqust ayları ərzində müraciət edə bilərlər.

Apelyasiya komissiyaları harada fəaliyyət göstərir?

Apelyasiya komissiyaları aşağıdakı məktəblərdə fəaliyyət göstərir:

Bakı şəhərinin inzibati rayonları üzrə:

  1. Binəqədi və Nəsimi rayonları üzrə 276 nömrəli tam orta məktəb (ünvan: Naxçıvani küçəsi 38)
  2. Səbail və Yasamal rayonları üzrə 236 nömrəli tam orta məktəb (ünvan: Badamdar qəsəbəsi, N.Paşayev küçəsi 4-6)
  3. Nizami və Nərimanov rayonları üzrə 129 nömrəli tam orta məktəb (ünvan: İ.Məmmədov küçəsi 9)
  4. Qaradağ rayonu üzrə 166 nömrəli məktəb-lisey (ünvan: Lökbatan qəsəbəsi, Nizami küçəsi 4)
  5. Xətai və Suraxanı rayonları üzrə 95 nömrəli tam orta məktəb (ünvan: Əhmədli qəsəbəsi, Q.Nəbi küçəsi 13)
  6. Sabunçu, Xəzər və Pirallahı rayonları üzrə 169 nömrəli tam orta məktəb (ünvan: Bakıxanov qəsəbəsi, S.Hüseyn küçəsi 9)

Gəncə şəhəri üzrə:

  1. Gəncə Dövlət Universiteti (ünvan: Gəncə şəhəri, Heydər Əliyev prospekti 187 )

Sumqayıt şəhəri üzrə:

  1. Sumqayıt Dövlət Universiteti (ünvan: Sumqayıt şəhəri, 43-cü məhəllə)

Abşeron rayonu üzrə:

  1. Bakı Dövlət İqtisadiyyat və Humanitar Kolleci (ünvan: Xırdalan şəhəri, 26-cı məhəllə)

Müsabiqənin nəticələrinə görə, Təhsil Nazirliyinin birbaşa tabeliyindəki lisey və gimnaziyalara qəbul edilməyən uşaqların valideynləri (qanuni nümayəndələri) elektron sistemdə yenidən ümumi təhsil məktəbi seçə bilərlərmi?

Bəli.

Təhsil Nazirliyinin birbaşa tabeliyindəki lisey və gimnaziyaların bir neçəsinə sorğu yerləşdirmək mümkündürmü?

Xeyr. Bu halda yalnız bir təhsil müəssisəsi seçməyə icazə verilir.

Uşaqların təhsil alacağı məktəbə yerləşdirilməsi tam olaraq hansı halda başa çatmış hesab olunur?

Valideynin (qanuni nümayəndənin) elektron sorğu yerləşdirdiyi məktəbə sənədləri təqdim edərək övladının məktəbə qəbul olunması barədə müvafiq qəbz almasından sonra uşağın məktəbə yerləşdirilməsi başa çatır.

Yerləşdirilmə bitdikdən sonra valideyn hansı addımları atmalıdır?

Yeni dərs ilinin ilk günü övladını məktəbə gətirməlidir.

Qeydiyyatdan keçdikdən sonra uşaqların məktəblərdə müsahibəyə cəlb olunması və ya onların ümumi psixoloji durumunun müəyyənləşdirilməsi üçün müvafiq söhbətlər aparılacaqmı?

Valideyn (qanuni nümayəndə) I sinfə şagird qəbulu üçün uşağın sağlamlığı haqqında tibbi arayışı (forma 26U) məktəbə təqdim etdiyinə görə uşağın psixoloji durumunun müəyyənləşdirilməsinə ehtiyac yaranmır.

Yaşı 8-dən yuxarı olan uşaqların I sinfə qəbulu mümkündürmü?

Bəli. Yaşı 8-dən yuxarı olan uşaqlar Azərbaycan Respublikası təhsil nazirinin 29.05.2014-cü il tarixli, 645 nömrəli əmri ilə təsdiq edilmiş “Fərdi təhsilin təşkili haqqında Qaydalar”ın tələblərinə uyğun olaraq fərdi təhsilə cəlb olunurlar.

Yaşı 8-dən yuxarı olan uşaqların qeydiyyatı üçün hara və hansı sənədlərlə müraciət edilməlidir?

Yaşı 8-dən yuxarı olan uşaqların valideynləri www.mektebeqebul.edu.az saytında qeydiyyatdan keçdikdən sonra həftənin II və IV günləri yaşayış yerindən arayış, 2 ədəd 3x4 rəngli fotoşəkil, valideynin (və ya qanuni nümayəndənin) və uşağın şəxsiyyətini təsdiq edən sənəd, ehtiyac yaranarsa, sağlamlıq haqqında arayışla (forma 26U) Bakı Şəhəri üzrə Təhsil İdarəsində, Sumqayıt Şəhər Təhsil Şöbəsində, Gəncə Şəhər Təhsil İdarəsində, Abşeron Rayon Təhsil Şöbəsində yaradılmış müvafiq komissiyaya müraciət etməlidir. Valideynlərə həmin komissiyaya uşağı da özləri ilə gətirmələri tövsiyə olunur.

Bakı şəhərində sağlamlıq imkanı məhdud uşaqların I sinfə qəbulu necə həyata keçirilir?

Sağlamlıq imkanı məhdud uşaqların I sinfə qəbulu üçün valideynlər ilkin olaraq aşağıda qeyd olunan sənədlərlə birlikdə həftənin III və V günləri Nəsimi rayonu 268 nömrəli xüsusi məktəbdə (ünvan: Bakı şəhəri Nəsimi rayonu, Süleyman Rüstəm küçəsi 38) təşkil olunmuş Pedaqoji-Tibbi-Psixoloji komissiyaya müraciət etməlidirlər. Valideynlərə həmin komissiyaya uşağı da özləri ilə gətirmələri tövsiyə olunur.

  • Valideynin və uşağın şəxsiyyətini təsdiq edən sənədin əsli və surəti;
  • Tibbi arayış;
  • 2 (iki) ədəd 3x4 ölçüdə rəngli fotoşəkil;
  • Yaşayış yerindən arayış;

Hansı halda uşağın məktəbə qəbuluna imtina verilə bilər?

İlk növbədə, məsul şəxs www.mektebeqebul.edu.az saytından elektron qeydiyyat zamanı valideynin (qanuni nümayəndənin) özü və uşaq haqqında daxil etdiyi məlumatları təqdim olunan sənədlərin əsli ilə üzləşdirərək yoxlayır və həmin sənədlərin surətini saxlayaraq, əslini dərhal valideynə (qanuni nümayəndəyə) qaytarır. Sənəd qəbulu üzrə məsul şəxs tərəfindən tələb olunan sənədlərin müvafiq tələblərə uyğun olmadığı aşkar edildikdə (elektron ərizə qeydiyyatı zamanı məlumatların bilərəkdən saxtalaşdırıldığı halda) və təhsil qanunvericiliyinin tələblərinin pozulduğu digər hallarda.

Uşaqların I sinfə qəbulunun qanunvericilik əsasları hansılardır?

Uşaqların I sinfə qəbulu “Təhsil haqqında” Azərbaycan Respublikasının Qanununa, Azərbaycan Respublikası Nazirlər Kabinetinin 13 yanvar 2011-ci il tarixli, 5 nömrəli qərarı ilə təsdiq edilmiş “Ümumtəhsil məktəbinin Nümunəvi Nizamnaməsi”nə, Azərbaycan Respublikası Təhsil Nazirliyi Kollegiyasının 06 noyabr 2014-cü il tarixli 1/3 nömrəli qərarı ilə təsdiq edilmiş “Uşaqların (şagirdlərin) ümumi təhsil müəssisələrinə qəbulu və yerdəyişməsi Qaydaları”na və digər müvafiq hüquqi-normativ aktlara əsasən həyata keçirilir.

I sinfə qəbulla əlaqədar sual yarandıqda hara müraciət etmək olar?

  • Elektron ərizənin qeydiyyatı ilə əlaqədar şəhər və rayon ərazisində fəaliyyət göstərən Alternativ Qeydiyyat Mərkəzlərinə;
  • Bütün digər hallarla bağlı şəhər və rayon ərazisində fəaliyyət göstərən Apelyasiya Komissiyasına.

Həmçinin, Bakı Şəhəri üzrə Təhsil İdarəsinin (012) 599-12-22 nömrəli telefonu (daxili: 6076; 6124), eləcə də info@baku.edu.gov.az elektron poçt ünvanı vasitəsilə, Gəncə Şəhər Təhsil İdarəsinin (022) 256-15-76 nömrəli telefonu, eləcə də ganja@edu.gov.az elektron poçt ünvanı vasitəsilə, Sumqayıt Şəhər Təhsil Şöbəsinin (018) 642-00-88 nömrəli telefonu, eləcə də sumgayıt@edu.gov.az elektron poçt ünvanı vasitəsilə, Abşeron Rayon Təhsil Şöbəsinin (012) 342 29 06 nömrəli telefonu, eləcə də absheron@edu.gov.az elektron poçt ünvanı vasitəsilə və Təhsil Nazirliyinin Telefon Məlumat Mərkəzinə (nömrə - 146) zəng etməklə, suallara aydınlıq gətirmək mümkündür.