ÜMUMİ TƏHSİL MƏKTƏBLƏRİNİN, LİSEY VƏ GİMNAZİYALARIN
I SİNFİNƏ ELEKTRON SƏNƏD QƏBULU SİSTEMİ

2021-2022-ci dərs ili üzrə ümumi təhsil müəssisələrinin I sinfinə şagird qəbulu üçün elektron ərizələrin qeydiyyatı üzrə

Reqlament

1. Prosesin ümumi təsviri

1.1. 2021-2022-ci dərs ili üçün ümumi təhsil müəssisələrinin I sinfinə şagird qəbulu aşağıdakı prosedurlar üzrə aparılır:
1.1.1. elektron ərizə formasının doldurulması;
1.1.2. tələb olunan sənədlərin təhsil müəssisəsinə təqdim olunması;
1.1.3. uşağın I sinfə qəbul olunması və ya imtina edilməsinə dair qərarın qəbulu.

1.2. 2021-2022-ci dərs ili üçün ümumtəhsil müəssisəsinin I sinfinə fiziki və əqli cəhətdən normal inkişaf etmiş, təqvim ili ərzində 6,7,8 yaşı bitən uşaqlar qəbul olunur.
1.2.1. Təqvim ili ərzində yaşı 8-dən çox olan uşaqlar fərdi təhsil üzrə I siniflərə qəbul olunur.

1.3. Bakı şəhərindəki bir sıra məktəblərdə onlayn qeydiyyat zamanı aşağıda göstərilən kateqoriyadan olan uşaqların məktəbə qəbulu üzrə üstünlük hüquqları təmin olunmalıdır:
1.3.1. valideyni (qanuni nümayəndəsi) qeydiyyat ünvanı üzrə həmin məktəb üçün müəyyən edilmiş ərazidə yaşayanlar;
1.3.2. valideyni (qanuni nümayəndəsi) həmin məktəbdə işləyənlər;
1.3.3. bacısı və ya qardaşı həmin məktəbdə təhsil alanlar.

1.4. 2020-2021-ci dərs ilində məktəbəhazırlıq qruplarında təhsil alan uşaqların növbəti tədris ili üçün həmin məktəbin I sinfinə qəbulu sistem tərəfindən avtomatik elektron sorğu yaradılmaqla həyata keçirilir.

1.5. Ümumtəhsil məktəblərində 2020-2021-ci dərs ilində tədris digər dillərdə aparılan məktəbəhazırlıq qruplarına cəlb olunmuş uşaqların I sinfə qəbul zamanı həmin dil üzrə şifahi nitq bacarıqlarının qiymətləndirilməsi üçün təşkil edilmiş müsahibədə iştirakı zəruridir.

1.6. Ümumtəhsil müəssisələrində 2021-2022-ci dərs ili üçün uşaqların I sinfə qəbulu valideynin (qanuni nümayəndənin) mektebeqebul.edu.az elektron sistemdə qeydiyyatı ilə başlayır:
1.6.1. Onlayn qeydiyyat valideynin (qanuni nümayəndə) özü tərəfindən aparılır;
1.6.2. hər hansı səbəbdən ərizənin onlayn qeydiyyatını şəxsən aparmaq imkanı olmayan valideynlər (qanuni nümayəndə) əvvəlcədən müəyyənləşdirilmiş ümumtəhsil müəssisələrində təşkil ediləcək Alternativ qeydiyyat mərkəzlərinin xidmətindən istifadə edə bilərlər;

1.7. Ərizələrin onlayn qeydiyyatı 27 aprel 2021-ci il tarixdən 14 Sentyabr 2021-ci il tarixədək aparılır.

1.8. Məktəb seçimi 29 aprel 2021-ci il tarixdən 14 Sentyabr 2021-ci il tarixədək həyata keçirilir.

2. Elektron müraciətin sistemdə yerləşdirilməsi

2.1. Valideyn (qanuni nümayəndə) elektron ərizəni doldurmazdan əvvəl mektebeqebul.edu.az elektron sistemində qeydiyyatdan keçməli və “Şəxsi kabinet” yaratmalıdır. Onlayn qeydiyyatdan yalnız aşağıda qeyd edilən üç sənəddən biri əsasında keçmək mümkündür:
2.1.1. Azərbaycan Respublikası vətəndaşları üçün Azərbaycan Respublikası vətəndaşının şəxsiyyət vəsiqəsi;
2.1.2. Əcnəbilər və vətəndaşlığı olmayan şəxslər üçün Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsi (olduğu təqdirdə);
2.1.3. Birləşmiş Millətlər Təşkilatının Qaçqınların İşləri üzrə Ali Komissarlığının (BMT QAK) Himayə Sənədi.

Qeyd: Valideynlərin (qanuni nümayəndə) onlayn qeydiyyatı yalnız göstərilən sənədlər əsasında aparılır. Digər sənədlər əsasında qeydiyyatdan keçmək üçün alternativ qeydiyyat mərkəzlərinə müraciət edə bilərsiniz.

Diqqət! Elektron sistemdən zəruri məlumatların və bildirişlərin vaxtında ötürülməsinin təmin olunması məqsədilə valideyn (qanuni nümayəndə) hökmən işlək əlaqə vasitələrini (mobil telefon nömrəsi və ya elektron poçt ünvanı) daxil etməlidir. Əks halda müvafiq məlumat və bildirişi almadığına görə məsuliyyət valideynin (qanuni nümayəndə) üzərinə düşür.

3. Uşağın qeydiyyatı

3.1. Valideyn (qanuni nümayəndə) sistemdə qeydiyyatdan keçib, “Şəxsi Kabinet” yaratdıqdan sonra sistemə uşaq(lar) haqqında məlumatları yerləşdirir:
3.1.1. Azərbaycan Respublikası Nazirlər Kabinetinin 13 yanvar 2011-ci il tarixli, 5 nömrəli Qərarı ilə təsdiq edilmiş “Ümumtəhsil məktəbinin Nümunəvi Nizamnaməsi”nin 2.5-ci bəndinə uyğun olaraq, ümumtəhsil məktəbinin I sinfinə hər il cari ilin sonunadək 6 (altı) yaşı tamam olan uşaqlar üçün qeydiyyat etmək mümkündür.

3.2. Sistemdə onlayn qeydiyyat uşağın şəxsiyyətini təsdiq edən 3 növ sənəddən biri əsasında aparılır:
3.2.1. Uşaq Azərbaycan Respublikasının vətəndaşıdırsa:
a. Azərbaycan Respublikası vətəndaşının şəxsiyyət vəsiqəsi;
3.2.2. Uşaq Azərbaycan Respublikasının vətəndaşı deyilsə:
a. Azərbaycan Respublikası ərazisində müvəqqəti və ya daimi yaşamaq üçün icazə vəsiqəsi (olduğu təqdirdə);
b. BMT QAK-ın himayə sənədi.

Qeyd: Uşaqların onlayn qeydiyyatı yalnız göstərilən sənədlər əsasında aparılır. Digər sənədlər əsasında qeydiyyatdan keçmək üçün Alternativ qeydiyyat mərkəzlərinə müraciət edə bilərsiniz.

Diqqət! Valideynin (qanuni nümayəndənin) 3 (üç) uşağı qeydiyyatdan keçirmək hüququ vardır. Əlavə uşaq qeydiyyatdan keçirmək üçün valideynə şəxsi kabinetininin əlaqə bölməsindən müraciət etmək tövsiyə olunur.

Qeyd: Sistemdə onlayn istifadə olunan bütün növ sənədlərin qeydiyyatı avtomatik olaraq dövlət elektron məlumat sistemindən alınmış məlumatlar əsasında aparılır.

4. Elektron ərizə doldurulmasının xüsusiyyətləri

4.1. “Şəxsi Kabinet”də tələb olunan məlumatlar addım-addım daxil edilir və məktəbə sorğu yerləşdirildikdən sonra elektron ərizə formalaşır.

4.2. Əgər elektron ərizə formasında sahələrin doldurulması zamanı daxiletmə formatında səhvə yol verilibsə və ya doldurulması zəruri olan sahələrə müvafiq məlumat daxil edilməyibsə, sistemdə “Səhvdir” bildirişi çıxır. Bu halda ərizənin qeydiyyatı mümkün deyildir. Prosesin davamı üçün düzəlişlərin edilməsi vacibdir.

5. Məktəbin seçilməsi

5.1. Valideyn (qanuni nümayəndə) qəbul qaydasından asılı olaraq elektron sistemdə mövcud olan 3 növ məktəbdən birini seçmək imkanına malikdir:
5.1.1. ümumtəhsil məktəbi;
5.1.2. lisey və ya gimnaziya
5.1.3. Özəl məktəb

5.2. Bu Reqlamentin 1.3-cü bəndində nəzərdə tutulmuş I sinfə üstün qəbul hüquqları ilə məktəbə qəbul aşağıdakı qaydada yoxlanılıb, təsdiq olunduqdan sonra reallaşır:
5.2.1. yaşayış ünvanının məktəbin mikroərazisində yerləşdiyi "Azərişıq" ASC-nin kodu və yaxud valideynin (qanuni nümayəndənin) (və ya uşağın) şəxsiyyət vəsiqəsində olan ünvan vasitəsi ilə eyniləşdirilir;
5.2.2. valideynlərin (qanuni nümayəndə) həmin məktəbdə işləməsi “Ümumi Təhsil Müəssisələrinin Məlumat Sistemi” ilə eyniləşdirilir;
5.2.3. uşağın bacısı və ya qardaşlarının həmin məktəbdə oxuması “Ümumi Təhsil Müəssisələrinin Məlumat Sistemi” ilə eyniləşdirilir;

5.3. Qeydiyyata alınmış elektron ərizələrdəki məlumatlar işçi qrupu tərəfindən dəqiqləşdirildikdən sonra 3 (üç) iş günü ərzində sistemə yerləşdirilir və valideynə (qanuni nümayəndə) SMS və ya elektron poçt vasitəsilə bildiriş göndərilir.

Diqqət! Uşağın yaşından və seçilmiş məktəbin növündən asılı olaraq, bildirişin mətni və mahiyyəti fərqlənə bilər.

Elektron ərizənin qeydiyyatı prosesində uşağın təhsil alacağı məktəbin və müəllimin seçilməsi təlim dilindən asılı olaraq aşağıdakı qaydada həyata keçirilir:
5.4.1. təlim dili Azərbaycan dili seçilərsə, uşağın təhsil alacağı məktəb və müəllim valideyn (qanuni nümayəndə) tərəfindən seçilir;
5.4.2. təlim dili digər dildə tədris aparılan bölmə seçilərsə (Bakı Avropa liseyi, Respublika İncəsənət gimnaziyası və Bülbül adına orta ixtisas musiqi məktəbi istisna olmaqla), övladı həmin dil üzrə şifahi nitq bacarıqlarının qiymətləndirilməsi üçün müvafiq qaydada təşkil edilmiş müsahibədən uğurla keçdikdən sonra valideyn (qanuni nümayəndə) məktəb və müəllim seçimi edir;

5.5. Təlim dili digər dildə tədris aparılan bölmə seçildiyi halda həmin dil üzrə şifahi nitq bacarıqlarının qiymətləndirilməsi üçün müvafiq qaydada təşkil edilmiş müsahibədən keçə bilməyən uşaqlar valideynlər tərəfindən seçilmiş məktəblərin Azərbaycan bölməsinə yerləşdirilir.

Diqqət! Əgər təhsil forması kimi “xüsusi təhsil” forması seçilmişdirsə, Psixoloji-Tibbi-Pedaqoji komissiyaya müraciət edilməlidir. Psixoloji-Tibbi-Pedaqoji komissiyanın qərarı verildikdən sonra sənədlər məktəbə təqdim olunur. PTPK 01.08.2021-ci il tarixdən etibarən həftənin III və V günləri saat 10:00-dan 16:00-dək 268 nömrəli xüsusi məktəbin binasında fəaliyyət göstərir. Ünvan: Bakı şəhəri, Nəsimi rayonu, S.Rüstəm küçəsi 38.

5.6. 2021/2022-ci tədris ili üçün I sinfə şagird qəbulu prosesində valideynlər şagird yerləri tutulmuş və yaxud qəbulu üstünlük hüququ əsasında aparılan məktəblərə boş şagird yerləri yarandığı halda sorğu yerləşdirilməsi üçün “Növbəlilik” funksiyası vasitəsilə növbəyə yazıla bilirlər.

5.7. “Növbəlilik” funksiyası I sinfə şagird qəbulu prosesində şagird yerləri tutulmuş və yaxud qəbulu üstünlük hüququ əsasında aparılan məktəblərdə aşağıdakı qaydada aparılır:
5.7.1. Şagird qəbulu üstünlük hüququ əsasında aparılmayan və şagird yerləri tutulmuş məktəblərdə əlavə şagird yerlərinin və yaxud siniflərin açılmasını müəyyənləşdirmək məqsədilə əvvəlcədən müəyyən edilmiş şagird yerinə uyğun növbə açılır.
5.7.2. Şagird qəbulu üstünlük hüququ əsasında aparılan və şagird yerləri tutulmuş məktəblərdə əlavə şagird yerlərinin və yaxud siniflərin açılmasını müəyyənləşdirmək məqsədilə əvvəlcədən müəyyən edilmiş şagird yerinə uyğun üstünlük hüquqları əsasında növbə açılır.
5.7.3. Şagird qəbulu üstünlük hüququ əsasında aparılan və boş şagird yerləri olan məktəblərdə mövcud şagird yerləri tutulmadıqda üsünlük hüququ olmayan uşaqların həmin məktəbə qəbulu üçün növbə açılır.

5.8. “Növbəlilik” funksiyası vasitəsilə növbəyə ancaq hər hansı məktəbə sorğu yerləşdirməyən valideynlər (qanuni nümayəndələr) yazıla bilir. Valideyn növbəyə yazıldıqdan sonra başqa məktəbə sorğu yerləşdirə bilər, ancaq yerləşdirdiyi sorğuya uyğun ərizəni çap edən zaman, onun növbəsinin silinməsi barədə valideynə bildiriş çıxır.

6. Müəllimin seçilməsi

6.1. Məktəbəhazırlıq qrupunda təhsil alan uşaq üçün təhsil aldığı məktəb və müəllim avtomatik olaraq sistem tərəfindən seçilir. Sistem tərəfindən sorğu yerləşdirildikdən sonra valideyn növbəti mərhələdə “Şəxsi Kabinet”dən ərizəni çap edib, lazımi digər sənədlərlə birgə məktəbə təqdim etməlidir. Valideyn seçimini dəyişmək istədiyi təqdirdə “Sorğunu sil” düyməsini sıxaraq yenidən seçim edə bilər.

6.2. Tədris dili və məktəb seçildikdən sonra istifadəçi üçün müəllimlərin siyahısından seçim etmək imkanı yaranır. Hər hansı bir müəllimin dərs deyəcəyi sinifdə şagird yerləri dolduqda həmin sinfə qəbul dayandırılır.

7. Elektron müraciətin silinməsi

7.1. Valideynin (qanuni nümayəndə) uşağın məktəbə qəbulu üzrə elektron ərizəni silmək imkanı var. Ərizə sistemdən silindiyi halda azad olmuş yer başqa istifadəçi tərəfindən tutula bilər.

7.2. Valideyn şəxsi kabinetində müvafiq məktəbə elektron sorğu yerləşdirib, tələb olunan sənədləri məktəbə təqdim edib, məktəb tərəfindən Sistemdə təsdiq vurulduqdan sonra sorğusunu ləğv edə bilməz. Yalnız məktəb tərəfindən sistemdə imtina düyməsi vurulduğu halda valideyn qeydiyyatdan keçdiyi nömrəyə göndərilmiş verifikasiya kodunu daxil edərək sorğunu silib başqa məktəb seçimi edə bilər.

8. Sənədlərin qəbulu

8.1. Müraciət prosesi müvəffəqiyyətlə başa çatdıqdan sonra I sinfə elektron ərizə vermiş valideyn (qanuni nümayəndə) ümumtəhsil müəssisəsinə aşağıdakı sənədləri təqdim etməlidir:
8.1.1. Azərbaycan Respublikasının vətəndaşları üçün - valideynin şəxsiyyətini təsdiq edən sənədin və uşağın şəxsiyyət vəsiqəsinin əsli və surəti;
8.1.2. Azərbaycan Respublikasının vətəndaşlığını sonradan almış və övladının doğum haqqında şəhadətnaməsi əvvəllər vətəndaşı olduğu ölkə tərəfindən verilmiş şəxslər üçün Azərbaycan Respublikasının 16 yaşına çatanadək vətəndaşa verilən şəxsiyyət vəsiqəsi və ya xarici ölkənin doğum haqqında şəhadətnaməsi;
8.1.3. xarici ölkə vətəndaşları üçün - valideynin xarici pasportu, Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsi (olduğu təqdirdə), uşağın doğum haqqında şəhadətnaməsinin əsli və surəti;
8.1.4. digər ölkələrin vətəndaşları olan, qaçqınlıq statusu almış şəxslər üçün Birləşmiş Millətlər Təşkilatının Qaçqınların İşləri üzrə Ali Komissarlığının Himayə Sənədi;
8.1.5. uşağın sağlamlığı haqqında tibbi arayışı (forma 26U);
8.1.6. 2 (iki) ədəd 3x4 ölçüdə rəngli fotoşəkil;
8.1.7. Valideynin (qanuni nümayəndə) “Şəxsi Kabinet”indən çap olunmuş “Ərizə” (mütləqdir). Ərizədə valideynin (qanuni nümayəndənin) və məktəb direktorunun imzası vacibdir. Ərizə uşağın sənədlərinin məktəbə qəbulu üçün əsas sayılır. Ərizənin çapına imkanı olmayan valideyn (qanuni nümayəndə) üçün həmin sənədin məktəbdə çap edilməsinə şərait yaradılır.

8.2. Uşağın ümumtəhsil müəssisəsinin I sinfinə qəbulundan aşağıdakı hallarda imtina edilə bilər. 8.2.1. elektron ərizənin qeydiyyatı zamanı məlumatların bilərəkdən saxtalaşdırıldığı halda;
8.2.2. bu Qaydaların 8.1-ci bəndində nəzərdə tutulmuş sənədlər təqdim edilmədikdə və ya təqdim edilmiş sənədlərlə qeydiyyat məlumatları arasında ziddiyyət müəyyən olunduqda;
8.2.7. qanunvericiliyin və bu qaydaların tələblərinin pozulduğu digər hallarda.

8.3. Bütün hallarda imtina təhsil müəssisəsinin məsul şəxsi tərəfindən əsaslandırılmalıdır. “İmtina et” düyməsi basıldıqdan sonra sistemdə bunun üçün xüsusi nəzərdə tutulmuş sahəyə imtinanın səbəbi daxil edilməlidir. Bundan sonra valideynə (qanuni nümayəndəyə) Apelyasiya komissiyasına (komissiyanın ünvanı və iş rejimi barədə elan nəzərəçarpan yerdə asılmalıdır) müraciət etmək hüququnun olduğu izah edilir.