ÜMUMTƏHSİL MƏKTƏBLƏRİNİN MƏKTƏBƏHAZIRLIQ QRUPUNA
ELEKTRON SƏNƏD QƏBULU SİSTEMİ



2018/2019-cu dərs ili üçün Bakı, Gəncə, Sumqayıt, Mingəçevir, Şirvan, Naftalan şəhərləri və Abşeron, Yevlax, Samux rayonları üzrə ümumi təhsil məktəblərində, o cümlədən həmin şəhər və rayonlarda yerləşən məcburi köçkün məktəblərinin məktəbəhazırlıq qruplarına uşaqların qeydiyyatının elektron sistem vasitəsilə həyata keçirilməsinə dair

SUAL-CAVAB

Elektron sistem hansı zərurətdən tətbiq edilir?

Məktəbəhazırlıq qruplarına elektron sənəd qəbulunun tətbiqi “Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında” Azərbaycan Respublikası Prezidentinin 23 may 2011-ci il tarixli Fərmanının tələblərinin həyata keçirilməsini təmin etmək üçün təhsil sahəsində əhaliyə göstərilən elektron xidmətlərin dairəsinin genişləndirilməsi məqsədilə tətbiq olunur. Məktəbəhazırlıq qruplarına uşaqların qəbulu üzrə müraciətlərin elektron qeydiyyat sistemi bu prosesin sadələşdirilməsinə xidmət edir.

Elektron sistem vasitəsilə məktəbəhazırlıq qruplarına sənəd qəbulu hansı rayon və şəhərləri əhatə edir?

Ərizələrin onlayn qeydiyyatı Bakı, Gəncə, Sumqayıt, Mingəçevir, Şirvan, Naftalan şəhərlərini və Abşeron, Yevlax, Samux rayonları üzrə ümumi təhsil məktəblərini, o cümlədən həmin şəhər və rayonlarda yerləşən məcburi köçkün məktəblərini əhatə edir.

Məktəbəhazırlıq qruplarına uşaqların elektron sənəd qəbulu necə həyata keçirilir?

Məktəbəhazırlıq qruplarına şagird qəbulu www.mektebeqebul.edu.az elektron sistemi vasitəsilə həyata keçirilir.

Məktəbəhazırlıq qruplarına hansı uşaqlar qəbul edilir?

Məktəblərdə təşkil olunmuş məktəbəhazırlıq qruplarına məktəbin yerləşdiyi ərazidə yaşayan və həmin ildə 5 yaşı tamam olan (2013-cü il təvəllüdlü) uşaqlar qəbul edilir. Yaşayış ərazisindəki məktəbdə məktəbəhazırlıq qrupu təşkil olunmadığı halda, uşaqlar digər məktəbdə yaradılan məktəbəhazırlıq qrupuna qəbul edilə bilər.

Məktəbəhazırlıq qruplarına uşaqların elektron sənəd qəbulu hansı müddətlərdə həyata keçirilir?

Bakı, Gəncə, Sumqayıt, Mingəçevir, Şirvan, Naftalan şəhərləri və Abşeron, Yevlax, Samux rayonları üzrə ümumi təhsil məktəblərində ərizələrin onlayn qeydiyyatı 15.08.2018-ci il tarixdən 20.09.2018-ci il tarixədək həyata keçirilir. Elektron ərizəsi qeydiyyata alınan şəxslər üçün sənədlərin məktəbə təqdim olunma müddəti 15 avqust 2018-ci il tarixdən başlayır, 25 sentyabr 2018-ci ildə başa çatır.

Bakı, Gəncə, Sumqayıt, Mingəçevir, Şirvan, Naftalan şəhərləri və Abşeron, Yevlax, Samux rayonlarında yerləşən məcburi köçkün məktəblərinin məktəbəhazırlıq qruplarına elektron sənəd qəbulu hansı müddətlərdə həyata keçirilir?

Bakı, Gəncə, Sumqayıt, Mingəçevir, Şirvan, Naftalan şəhərləri və Abşeron, Yevlax, Samux rayonlarında yerləşən məcburi köçkün məktəbləri üzrə ərizələrin onlayn qeydiyyatı 05.09.2018-ci il tarixdən 20.09.2018-ci il tarixədək həyata keçirilir. Elektron ərizəsi qeydiyyata alınan şəxslər üçün sənədlərin məktəbə təqdim olunma müddəti 5 sentyabr 2018-ci il tarixdən başlayır, 25 sentyabr 2018-ci ildə başa çatır.

Məktəbəhazırlıq qruplarına uşaqların elektron sənəd qəbulu həyata keçirilən rayon və şəhərlərdə ərazi prinsipinin tətbiqi gözlənilirmi?

Yalnız Bakı şəhərinin bir sıra ümumi təhsil məktəblərində məktəbəhazırlıq qruplarına qəbul ərazi prinsipi əsasında aparılır. Digər rayon və şəhərlərdə ərazi prinsipi tətbiq olunmur. Məcburi köçkün məktəblərindəki məktəbəhazırlıq qruplarına yalnız məcburi köçkün ailələrindən olan uşaqlar qəbul olunur.

Məktəbəhazırlıq qruplarına uşaqların qəbulu üçün hara və hansı sənədlərin təqdim edilməsi tələb olunur?

Valideyn (qanuni nümayəndə) məktəbəhazırlıq qruplarına şagird qəbulu üçün aşağıdakı sənədləri məktəbə təqdim etməlidir:

  • Valideynin və uşağın şəxsiyyətini təsdiq edən sənədin əsli və surəti (uşağın şəxsiyyət vəsiqəsi olmadığı halda doğum haqqında şəhadətnaməsi; Azərbaycan Respublikasının ərazisində müvəqqəti və ya daimi yaşamaq üçün icazə vəsiqəsi (olduğu təqdirdə); Birləşmiş Millətlər Təşkilatının Qaçqınların İşləri üzrə Ali Komissarlığının Himayə sənədi; xarici ölkələrdə verilmiş doğum haqqında şəhadətnamə (Azərbaycan dilinə tərcümə olunmuş və natorial qaydada təsdiq edilmiş));
  • Uşağın mübadilə vərəqi (sağlamlıq haqqında arayış-forma 26U);
  • 2 (iki) ədəd 3x4 ölçüdə rəngli fotoşəkil;
  • valideynin (qanuni nümayəndənin) “Şəxsi kabinet”indən çap olunmuş “Ərizə”.

Məktəbəhazırlıq qruplarına sənəd qəbulunun elektron sistem vasitəsilə həyata keçirilməsi valideynlərə hansı imkanları verir?

Məktəbəhazırlıq qruplarına qəbulun elektron sistem vasitəsilə həyata keçirilməsi şəffaflığın təmin edilməsi, vaxt itkisinin aradan qaldırılması, cəmiyyətdə informasiya texnologiyalarından istifadə mədəniyyətinin formalaşması baxımından olduqca əhəmiyyətlidir.

Elektron ərizənin qeydiyyatı kim tərəfindən aparıla bilər?

Qeydiyyat valideyn (qanuni nümayəndə) tərəfindən onlayn (www.mektebeqebul.edu.az) və ya Bakı, Gəncə, Sumqayıt, Mingəçevir, Şirvan, Naftalan şəhərləri və Abşeron, Yevlax, Samux rayonları üzrə məktəbəhazırlıq qruplarına elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə müəyyənləşdirilmiş 82 məktəbdə fəaliyyət göstərən Alternativ Qeydiyyat Mərkəzlərində aparıla bilər.

Alternativ Qeydiyyat Mərkəzləri harada fəaliyyət göstərir?

Məktəbəhazırlıq qruplarına elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə aşağıdakı məktəblərdə ərizə qəbulu üzrə Alternativ Qeydiyyat Mərkəzləri fəaliyyət göstərir.

Alternativ Qeydiyyat Mərkəzləri harada fəaliyyət göstərir?

Məktəbəhazırlıq qruplarına elektron sistem vasitəsilə ərizələrin qeydiyyatı məsələlərində vətəndaşlara kömək göstərilməsi məqsədilə aşağıdakı məktəblərdə ərizə qəbulu üzrə Alternativ Qeydiyyat Mərkəzləri fəaliyyət göstərir.

Bakı şəhərinin inzibati rayonları – Səbail rayonu üzrə 7, 163, 236 nömrəli, Nizami rayonu üzrə 12, 129, 145, 214 nömrəli, Nəsimi rayonu üzrə 19, 44, 247 nömrəli, Yasamal rayonu üzrə 18, 21, 60 nömrəli, Nərimanov rayonu üzrə 57, 82, 177 nömrəli, Xətai rayonu üzrə 17, 24, 116, 165, 191 nömrəli, Sabunçu rayonu üzrə 69, 74, 75, 78, 128, 130, 170 nömrəli, Suraxanı rayonu üzrə 84, 270, 279, 285, 315 nömrəli, Qaradağ rayonu üzrə 110, 180, 195, 228, 274, 288 nömrəli, Xəzər rayonu üzrə 117, 120, 156, 181, 234 nömrəli, Pirallahı rayonu üzrə 235 nömrəli, Binəqədi rayonu üzrə 83, 102, 182, 297, 313 nömrəli tam orta məktəblərdə;

Gəncə şəhəri üzrə 10, 16, 25, 27, 32 nömrəli tam orta məktəblər;

Sumqayıt şəhəri üzrə 6, 16, 23, 28 nömrəli tam orta məktəblər;

Abşeron rayonu üzrə Xırdalan şəhəri 4 nömrəli və 6 nömrəli, Masazır kənd 3 nömrəli, Mehdiabad kənd 3 nömrəli, Qobu qəsəbəsi 2 nömrəli, Saray qəsəbə 3 nömrəli tam orta məktəb;

Mingəçevir şəhəri üzrə Şəhər 1 nömrəli tam orta məktəb, Şəhər 4 nömrəli tam orta məktəb, Texniki-Humanitar lisey;

Şirvan şəhəri üzrə S.Hüseynov adına 1 №-li məktəb-lisey, E.İmanov adına 10 №-li tam orta məktəb, T.Bağırov adına 11 №-li tam orta məktəb, M.Osmanov adına 20 №-li tam orta məktəb;

Naftalan şəhəri üzrə İ.Nəsimi adına 1 nömrəli tam orta məktəb;

Yevlax rayonu üzrə Şəhər 2 nömrəli tam orta məktəb;

Samux rayonu üzrə Samux şəhər 1 saylı məktəb-lisey, Qarayeri qəsəbə 1 saylı məktəb-lisey, İnstitut qəsəbə tam orta məktəb, Sərkar kənd tam orta məktəb, Lüksenburq kənd tam orta məktəb, Seyidlər kənd tam orta məktəb, Poylu kənd tam orta məktəb, Əhmədbəyli kənd tam orta məktəb.

Elektron sistemdən istifadə ödənişlidirmi?

Xeyr, elektron sənəd qəbulu sistemindən istifadə üçün heç bir ödəniş tələb olunmur.

Məktəbəhazırlıq qruplarında təhsil ödənişlidirmi?

Məktəbəhazırlıq qruplarında təhsil dövlət hesabına həyata keçirilir. Bu qruplar dövlət vəsaiti hesabına müvafiq təlim və metodiki vəsaitlərlə təmin edilir.

Elektron sistemdə qeydiyyat zamanı istifadəçi hansı əlaqə vasitələrindən istifadə edə bilər?

Mobil telefon və ya elektron poçt ünvanı.

Məktəblərin seçimi hansı qaydada aparılır?

Valideyn (qanuni nümayəndə) elektron sistemdə seçdiyi məktəbə sorğu yerləşdirməlidir.

Məktəbəhazırlıq qruplarına qəbul üzrə müraciətlərin çox olduğu bəzi məktəblərdə şagird qəbulu, ilk növbədə, hansı prioritetlər nəzərə alınmaqla aparılır?

Bakı şəhərində yerləşən bir sıra məktəblərdə məktəbəhazırlıq qruplarına onlayn qeydiyyat zamanı aşağıda qeyd olunan uşaqların məktəbə qəbulu üzrə üstünlük hüquqları təmin olunur:

  • valideynləri və ya qanuni nümayəndələri məktəbin müəyyən edilmiş mikroərazisində yaşayanlar;
  • valideynləri və ya qanuni nümayəndələri həmin məktəbdə işləyənlər;
  • bacı və qardaşları həmin məktəbdə oxuyanlar.

Məcburi köçkün ailəsindən olan vətəndaşa dair məlumatlar tapılmırsa nə etmək lazımdır?

Seçilmiş uşağın məlumatları "Vahid Aylıq Müavinətlə Bağlı Elektron İnformasiya Sistemi"ndə tapılmırsa, vətəndaş daimi qeydiyyatda olduğu rayon icra hakimiyyətinə müraciət etməlidir.

Bakı şəhəri üzrə məktəbəhazırlıq qruplarına qəbul zamanı paytaxtda daimi qeydiyyatı olmayan, müvəqqəti və ya qeydiyyatsız yaşayan vətəndaşlar uşaqlarını elektron sistemdə qeydiyyatdan necə keçirə bilərlər?

Bakıda ərazi prinsipi tətbiq olunan məktəblərdə, ilk növbədə, həmin təhsil müəssisələrinin mikroərazisində daimi qeydiyyatda olan vətəndaşlar övladlarını elektron sistem vasitəsilə qeydiyyatdan keçirə bilərlər. Həmin valideynlərə müvəqqəti və ya qeydiyyatsız yaşadıqları ərazidə yerləşən məktəbdə sıxlıq olduğu halda, digər məktəbləri seçmələri tövsiyə olunur. Onu da qeyd edək ki, müvəqqəti və ya qeydiyyatsız yaşayan valideynlər ərazi prinsipi tətbiq olunmayan bütün məktəblərdə övladlarını məktəbəhazırlığa elektron sistem vasitəsilə qeydiyyatdan keçirə bilərlər.

Elektron qeydiyyat zamanı bir neçə məktəb seçmək mümkündürmü?

Xeyr. Valideynə yalnız bir məktəb seçərək sorğu yerləşdirmək imkanı yaradılır.

Valideyn məktəb seçdikdən sonra fikrini (seçimini) dəyişə bilərmi?

Bəli. Bunun üçün o, sistemə əvvəl yerləşdirdiyi sorğunu ləğv etməli, sonra yeni məktəb seçməlidir.

Xarici ölkə vətəndaşının elektron ərizəsinin qeydiyyatı necə aparılır?

Xarici ölkə vətəndaşının elektron ərizəsinin qeydiyyatı Azərbaycan Respublikasının ərazisində müvəqqəti və ya daimi yaşamaq üçün Dövlət Miqrasiya Xidmətindən aldığı icazə vəsiqəsi və xarici ölkənin doğum haqqında şəhadətnaməsi əsasında aparılır.

Apelyasiya komissiyaları harada fəaliyyət göstərir?

Apelyasiya komissiyaları aşağıdakı məktəblərdə fəaliyyət göstərir:

Bakı şəhərinin inzibati rayonları üzrə:
1. Binəqədi və Nəsimi rayonları üzrə 276 nömrəli tam orta məktəb (ünvan: Naxçıvani küçəsi 38)
2. Səbail və Yasamal rayonları üzrə 236 nömrəli tam orta məktəb (ünvan: Badamdar qəsəbəsi, N.Paşayev küçəsi 4-6)
3. Nizami və Nərimanov rayonları üzrə 129 nömrəli tam orta məktəb (ünvan: İ.Məmmədov küçəsi 9)
4. Qaradağ rayonu üzrə 166 nömrəli məktəb-lisey (ünvan: Lökbatan qəsəbəsi, Nizami küçəsi 4)
5. Xətai və Suraxanı rayonları üzrə 95 nömrəli tam orta məktəb (ünvan: Əhmədli qəsəbəsi, Q.Nəbi küçəsi 13)
6. Sabunçu, Xəzər və Pirallahı rayonları üzrə 169 nömrəli tam orta məktəb (ünvan: Bakıxanov qəsəbəsi, S.Hüseyn küçəsi 9)

Gəncə şəhəri üzrə:
1. Gəncə Dövlət Universiteti (ünvan: Gəncə şəhəri, Heydər Əliyev prospekti 187)

Sumqayıt şəhəri üzrə:
1. Sumqayıt Dövlət Universiteti (ünvan: Sumqayıt şəhəri, 43-cü məhəllə)

Abşeron rayonu üzrə:
1. Bakı Dövlət İqtisadiyyat və Humanitar Kolleci (ünvan: Xırdalan şəhəri, 26-cı məhəllə)

Mingəçevir şəhəri üzrə:
1. Texniki- Humanitar lisey (ünvan: Rəsul Rza küçəsi 14a)

Şirvan şəhəri üzrə:
1. Şirvan Şəhər Təhsil Şöbəsi (ünvan: Məmməd Əmin Rəsulzadə prospekti 10)

Naftalan şəhəri üzrə:
1. İ.Nəsimi adına 1 nömrəli tam orta məktəb (ünvan: Şıxəli Qurbanov küçəsi 1)

Yevlax rayonu üzrə:
1. Şəhər 2 nömrəli tam orta məktəb (ünvan: Heydər Əliyev prospekti 66)

Samux rayonu üzrə:
1. Samux şəhər 1 saylı məktəb-lisey (ünvan: Heydər Əliyev prospekti 22)
2. Qarayeri qəsəbə 1 saylı məktəb-lisey (ünvan: ünvan: Qarayeri qəsəbəsi)
3. İnstitut qəsəbə tam orta məktəb (ünvan: İnstitut qəsəbəsi)

Yerləşdirilmə bitdikdən sonra valideyn hansı addımları atmalıdır?

Qaydalara uyğun olaraq, məktəbəhazırlıq qruplarında məşğələlərin hər il oktyabrın 1-də başlaması nəzərdə tutulur. Valideynlər 1 oktyabr 2018-ci il tarixdən övladını məktəbə gətirməlidir.

Qeydiyyatdan keçdikdən sonra uşaqların məktəblərdə müsahibəyə cəlb olunması və ya onların ümumi psixoloji durumunun müəyyənləşdirilməsi üçün müvafiq söhbətlər aparılacaqmı?

Valideyn (qanuni nümayəndə) məktəbəhazırlıq qruplarına uşaqların qəbulu üçün uşağın mübadilə vərəqini (sağlamlığı haqqında tibbi arayışı (forma 26U)) məktəbə təqdim etdiyinə görə uşağın psixoloji durumunun müəyyənləşdirilməsinə ehtiyac yaranmır.

Uşaq hansı halda məktəbəhazırlıq qrupuna qəbul olunmaya bilər?

İlk növbədə, məsul şəxs mektebeqebul.edu.az saytından elektron qeydiyyat zamanı valideynin (qanuni nümayəndənin) özü və uşaq haqqında daxil etdiyi məlumatları təqdim olunan sənədlərin əsli ilə üzləşdirərək yoxlayır və həmin sənədlərin surətini saxlayaraq, əslini dərhal valideynə (qanuni nümayəndəyə) qaytarır. Sənəd qəbulu üzrə məsul şəxs tərəfindən tələb olunan sənədlərin müvafiq tələblərə uyğun olmadığı aşkar edildikdə (elektron ərizə qeydiyyatı zamanı məlumatların bilərəkdən saxtalaşdırıldığı halda) və təhsil qanunvericiliyinin tələblərinin pozulduğu digər hallarda.

Məktəbəhazırlıq qruplarında tədris ilinin təşkili necə müəyyənləşdirilib və tətillər olacaqmı?

Məktəbəhazırlıq qruplarında dərs ili iki yarımilə bölünəcək:
- I yarımil: 1 oktyabr-26 yanvar;
- II yarımil: 1 fevral-31 may.
Dərs ili ərzində aşağıdakı tətillər müəyyən olunub:
- 5 gün payız tətili (16-20 noyabr);
- 5 gün qış tətili (27-31 yanvar);
- 5 gün əlavə tətil (1-5 may).

Məktəbəhazırlıq qruplarında hansı müəllimlər məşğələ aparacaq??

Məktəbəhazırlıq qruplarında məşğələlərin aparılması, bir qayda olaraq, bu sahədə davamlı iş təcrübəsi olan, həmin tədris ilində IV sinifdə dərs deyəcək və növbəti dərs ilində I sinfi qəbul edəcək ibtidai sinif müəllimlərinə həvalə olunur.

Məktəbəhazırlıq qruplarında uşaqlara qiymət yazılacaqmı?

Məktəbəhazırlıq qruplarında məşğələlərə davamiyyət və tədris olunan mövzu müvafiq jurnalda qeyd ediləcək, uşaqların təlim nailiyyətləri şifahi formada qiymətləndiriləcək və bu barədə valideynlərə məlumat veriləcək.

Məktəbəhazırlıq qruplarında təhsil alan uşaqlara ev tapşırıqlarının verilməsi nəzərdə tutulurmu?

Məktəbəhazırlıq qruplarında təhsil alan uşaqlar üçün ev tapşırıqları nəzərdə tutulmur.

Məşğələlərin müddəti necə müəyyən olunur?

- Həftədə 4 gün olmaqla, 12 məşğələ;
- Bir gün ərzində 3 məşğələ;
- Bir məşğələnin müddəti 30 dəqiqə, məşğələlərarası fasilə 10 dəqiqə;
- Zehni gərginlik tələb edən məşğələlərdə, bir qayda olaraq, 3 idman dəqiqəsi keçirilir.

Məktəbəhazırlıq qruplarında hansı dərs məşğələləri tədris olunacaq?

Məktəbəhazırlıq qruplarında “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi” və “Fiziki mədəniyyət” dərs məşğələləri tədris ediləcək.

Məktəbəhazırlıq qruplarında həftədə neçə saat məşğələ aparılacaq?

Məktəbəhazırlıq qruplarının 2018/2019-cu dərs ilinə aid tədris (məşğələ) planına əsasən, məktəbəhazırlıq məşğələlərində həftədə 12 saat tədris aparılması nəzərdə tutulub.

Məktəbəhazırlıq qruplarında uşaqların say həddi necə müəyyənləşdirilir?

- Qəsəbə və kəndlərdə yerləşən ümumtəhsil məktəbləri üçün - ən azı 10 uşaq;
- Şəhərlərdə yerləşən ümumtəhsil məktəbləri üçün - ən azı 15 uşaq;
- Dövlət ümumtəhsil məktəblərində yaradılan məktəbəhazırlıq qrupunda uşaqların sayının 30 nəfərdən artıq olmasına yol verilmir.

Məktəbəhazırlıq qrupları bütün şəhər və rayonlarda fəaliyyət göstərəcək?

Məktəbəhazırlıq qrupları ölkənin bütün şəhər və rayonlarında fəaliyyət göstərəcək.

Bakı şəhəri üzrə məktəbəhazırlıq qrupları hansı məktəblərdə təşkil edilməyəcək?

Məktəbin şagird tutumu imkan vermədiyi üçün Binəqədi rayonu üzrə 83 və 299 nömrəli məktəb-lisey, 126,179, 205, 298 və 306 nömrəli, Nərimanov rayonu üzrə 304 nömrəli məktəb-lisey və 93,193 nömrəli, Səbail rayonu üzrə 50 və 162 nömrəli, Nəsimi rayonu üzrə 14 nömrəli, Pirallahı rayonu üzrə 131 nömrəli, Qaradağ rayonu üzrə 195 nömrəli, Sabunçu rayonu üzrə 4, 22, 71, 81, 113, 192, 198, 255, 296 və 311 nömrəli, Suraxanı rayonu üzrə 316 nömrəli, Xətai rayonu üzrə 264 nömrəli məktəb-lisey, 221, 249 və 269 nömrəli, Xəzər rayonu üzrə 92, 149, 216, 218 və 326 nömrəli və Yasamal rayonu üzrə 167 və 175 nömrəli tam orta məktəblərdə 2018/2019-cu tədris ilində məktəbəhazırlıq qrupları təşkil edilməyəcək.

Məktəbəhazırlıq qruplarına qəbulla əlaqədar sual yarandıqda hara müraciət etmək olar?

  • Elektron ərizənin qeydiyyatı ilə əlaqədar şəhər və rayon ərazisində fəaliyyət göstərən Alternativ Qeydiyyat Mərkəzlərinə;
  • Bütün digər hallarla bağlı şəhər və rayon ərazisində fəaliyyət göstərən Apelyasiya Komissiyasına.

Həmçinin, Bakı Şəhəri üzrə Təhsil İdarəsinin (012) 599-12-22 nömrəli telefonu (daxili: 6076; 6124), eləcə də info@baku.edu.gov.az elektron poçt ünvanı vasitəsilə, Gəncə Şəhər Təhsil İdarəsinin (022) 256-15-76 nömrəli telefonu, eləcə də ganja@edu.gov.az elektron poçt ünvanı vasitəsilə, Sumqayıt Şəhər Təhsil Şöbəsinin (018) 642-00-88 nömrəli telefonu, eləcə də sumgayıt@edu.gov.az elektron poçt ünvanı vasitəsilə, Mingəçevir Şəhər Təhsil Şöbəsinin (0-2427) 5-47-65 nömrəli telefonu, eləcə də mingachevir@.edugov.az elektron poçt ünvanı vasitəsilə, Şirvan Şəhər Təhsil Şöbəsinin (0-2121) 5-02-91 nömrəli telefonu, eləcə də shirvan@edu.gov.az elektron poçt ünvanı vasitəsilə, Naftalan Şəhər Təhsil Şöbəsinin (0-2235) 2-30-64 nömrəli telefonu, eləcə də naftalan@edu.gov.az elektron poçt ünvanı vasitəsilə, Abşeron Rayon Təhsil Şöbəsinin (012) 342 29 06 nömrəli telefonu, eləcə də absheron@edu.gov.az elektron poçt ünvanı vasitəsilə, Yevlax Rayon Təhsil Şöbəsinin (0-22-33) 6-33-84 nömrəli telefonu, eləcə də yevlakh@edu.gov.az elektron poçt ünvanı vasitəsilə, Samux Rayon Təhsil Şöbəsinin (0-22-27) 51-159 nömrəli telefonu, eləcə də samukh@edu.gov.az elektron poçt ünvanı vasitəsilə və Təhsil Nazirliyinin Telefon Məlumat Mərkəzinə (nömrə - 146) zəng etməklə, suallara aydınlıq gətirmək mümkündür.